დღეს კი მძიმე ტკივილით და ემოციით იგონებს თითოეული ჩვენი მოქალაქე ტრაგიკულ დღეებს, 27 წლის წინათ რუსეთის ინსპირირებით მომხდარ შეიარაღებულ დაპირისპირებას აფხაზეთში,  რომელიც 13 თვე და 13 დღე გაგრძელდა; სხვადასხვა კვლევებით 10 ათასიდან 30 ათასამდე სამხედრო და სამოქალაქო პირის სიცოცხლე შეიწირა. დევნილად იქცა 300 ათასამდე ადამიანი.

ქართველი ერისთვის ამ ტრაგიკულ დღეს აფხაზეთში დაღუპულთა მემორიალი ტრადიცულად გვირგვინებით შეამკეს და დაღუპულთა ხსოვნას პატივი მიაგეს აფხაზეთის საზოგადოებრიობის წარმომადგენლებმა, დაღუპულთა ოჯახის წევრებმა, თანამებრძოლებმა, საქართველოს ხელისუფლების, სხვადასხვა პარტიის, მოძრაობების წევრებმა.

აფხაზეთის ავტონომიური რესპუბლიკის ხელისუფლება, უმაღლესი საბჭოს დეპუტატები და ავტონომიური რესპუბლიკის მთავრობის წევრები, პირველი პირების, ბატონების ჯემალ გამახარიასა და რუსლან აბაშიძის ხელმძღვანელობით, 27 სექტემბერს დილიდანვე მემორიალთან მივიდნენ და პატივი მიაგეს სამშობლოსათვის თავგანწირული მეომრების ხსოვნას, შეხვდნენ და გაესაუბრნენ მათი ოჯახების წევრებს;

გმირთა მემორიალიდან აფხაზეთის ავტონომიური რესპუბლიკის ხელისუფლების წარმომადგენლები გაემართნენ და გვირგვინებით შეამკეს საქართველოს ეროვნული გმირების, ჟიული შარტავას, მამია ალასანიას, სოხუმის მერის გურამ გაბისკირიას საფლავები, ვაშლიჯვრის ძმათა სასაფლაო; მონაწილეობა მიიღეს სამების საკათედრო ტაძარში სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის მიერ აფხაზეთის ომში დაღუპულთა სულების მოსახსენებელ პანაშვიდში.