ჯემალ გამახარია: საქართველოს პრემიერ-მინისტრის ინიციატივამ უნდა უპასუხოს ახალ გამოწვევას, რაც უკავშირდება რუსეთის მიერ აფხაზეთის ანექსიის ღიად გაცხადებულ განზრახვას

როგორც ცნობილია, ამა წლის 21 ივნისს საქართველოს პრემიერ-მინისტრის ირაკლი ღარიბაშვილის გადაწყვეტილებით შეიქმნა სახელმწიფო კომისია, რომელმაც „დეოკუპაციისა და კონფლიქტის მშვიდობიანი მოგვარებისთვის სახელმწიფო სტრატეგია“ უნდა მოამზადოს. ამ მნიშვნელოვან ინიციატივასა და ოკუპირებულ ტერიტორიაზე ამასთან დაკავშირებით გამოხატული რეაქციის თაობაზე დასმული შეკითხვის პასუხად, აფხაზეთის უმაღლესი საბჭოს თავმჯდომარემ, ჯემალ გამახარიამ განაცხადა:

 

 

 

პირველ რიგში, ვიტყვი, რომ ეს არის უმნიშვნელოვანესი ინიციატივა. მეტ-ნაკლებად სრულყოფილი დეოკუპაციისა და კონფლიქტის მოგვარების სახელმწიფო სტრატეგია საქართველოს ყოველთვის ჰქონდა და დღესაც აქვს, მაგრამ არსებული რეალიების გათვალისწინებით შეუძლებელია, რომ ის იყოს ხანგრძლივ პერიოდზე გათვლილი. მოგეხსენებათ, ვითარება ოკუპირებულ ტერიტორიებზე, საერთაშორისო არენაზე, გარკვეულწილად ოკუპანტ სახელმწიფოშიც კი ცვალებადია. შესაბამისად, საჭიროა ამჟამად არსებულ კონკრეტულ ვითარებას მაქსიმალურად მორგებული კონკრეტული, რეალისტური სტრატეგიის ჩამოყალიბება. მის შექმნაში მონაწილეობას მიიღებს საზოგადოების ფართო სპექტრი. ცხადია, სტრატეგიის ჩამოყალიბებაში უმაღლესი საბჭოც თავის წვლილს შეიტანს. აღნიშნულ საკითხთან დაკავშირებით ახლო მომავალში გაიმართება სერიოზული მსჯელობა როგორც პრეზიდიუმზე, ისე პლენარულ სხდომებზეც. მინდა თქვენი ყურადღება გავამახვილო იმ გარემოებაზე, რომ სახელმწიფო კომისიას ევალება არა მხოლოდ საერთოეროვნული სტრატეგიის შემუშავება, არამედ, რაც განსაკუთრებით მისასალმებელია, მისი განხორციელებაც, რაც იმის გარანტიაა, რომ დოკუმენტი პირველივე დღიდან ამუშავდება. მსგავსი უფლებამოსილებით აღჭურვილი კომისია ადრე არ შექმნილა.

 

მიგვაჩნია, რომ პრემიერის ინიციატივა დროულია. მან უნდა უპასუხოს ახალ გამოწვევას, რაც უკავშირდება რუსეთის მიერ აფხაზეთის ანექსიის ღიად გაცხადებულ განზრახვას. მხედველობაში მაქვს 2020 წლის 12 ნოემბერს აფხაზეთისთვის თავსმოხვეული შეთანხმება - აფხაზეთსა და რუსეთს შორის საერთო სოციალური და ეკონომიკური სივრცის ჩამოყალიბების ე. წ. პროგრამა. ჩვენი პრემიერ-მინისტრის ინიციატივის ხორცშესხმა არსებითად უნდა იქცეს იმ მაშველ რგოლად, რომელიც იხსნის აფხაზეთს ანექსიისაგან და გარდუვალი დაღუპვისაგან. ამ დროს სოხუმიდან, ასევე ცხინვალიდანაც გვესმის სიმწრის ღიმილის მომგვრელი, მართლაც, უაზრო და, მართლაც, ცარიელი განცხადებები. აფხაზეთის დე-ფაქტო მმართველობა კრინტს ვერ ძრავს აიბგას ანექსიის გამო, ვერ უპირისპირდება მოსკოვის მოთხოვნით ხელმოწერილ „პროგრამას“, ორმაგი მოქალაქეობის დამღუპველ გეგმას, სამაგიეროდ „აკრიტიკებს“ საქართველოს მომავალ სტრატეგიას, რომელმაც უნდა იხსნას აფხაზეთი გაქრობისაგან. სასაცილოა ეს ყოველივე, სატირალი რომ არ იყოს! ოკუპანტის მიერ ნაკარნახევ განცხადებებს, რომლებიც სოხუმში კეთდება, ყველაზე ნაკლები ყურადღება უნდა მივაქციოთ. მიუხედავად, საოკუპაციო რეჟიმების ოფიციალური პოზიციისა, დარწმუნებული ვარ არაერთი ღირსეული აფხაზი მიიღებს მონაწილეობას „დეოკუპაციისა და კონფლიქტის მშვიდობიანი მოგვარებისთვის საქართველოს სახელმწიფო სტრატეგიის“ ჩამოყალიბებასა და რეალიზაციაში!“ - განაცხადა ბატონმა ჯემალ გამახარიამ.

 

ბეჭდვა
თავმჯდომარე
 Copyright 2010 All rights reserved
developed by websolutions