ძნელი მისახვედრი არ არის, რომ აფხაზეთში სერგეი ლავროვის ჩასვლის მიზნებთან დაკავშირებით მოსკოვში გავრცელებული ოფიციალური ვერსია სრულ სიმართლეს არ შეეფერება. როგორი გასაოცარიც არ უნდა იყოს, კრემლის ესოდენ მაღალი რანგის წარმომადგენელი ოკუპირებულ ტერიტორიაზე ორდღიანი ვიზიტისთვის იცლის იმ პირობებში, როდესაც საერთაშორისო ურთიერთობები უკიდურესად დაძაბულია და შექმნილი ფეთქებადსაშიში მდგომარეობა მისგან სერიოზულ დიპლომატიურ ძალისხმევას მოითხოვს. ასეთ ვითარებაში „პრიორიტეტულ მიმართულებად“ ოკუპირებული აფხაზეთის შერჩევა და იქ კრემლის ემისრის მივლინება შემთხვევით არ მომხდარა. აღნიშნული ნაბიჯი წარმოადგენს ცივილიზებული სამყაროსაგან ფაქტობრივად იზოლირებული, მკაცრი ეკონომიკური და პოლიტიკური სანქციების ქვეშ მყოფი რუსეთის მიერ ძალის დემონსტრირების მცდელობას. ეს არის თავისებური გზავნილი, თუ გნებავთ, მუქარა ბოლო პერიოდში დიპლომატიური და სამხედრო თვალსაზრისით გააქტიურებული ამერიკის შეერთებული შტატების, მთლიანად ევროატლანტიკური გაერთიანების მიმართ. ამ გზავნილით თუ მუქარით მოსკოვი ნატოს წინაშე ახდენს შავ ზღვაზე დომინირების დემონსტრირებას და აფრთხილებს მას, რომ ახლო აღმოსავლეთის რეგიონთან, მით უმეტეს ევროპასთან საკმაოდ ახლოს, გარდა მის მიერ ანექსირებული ყირიმისა, იგი ფლობს ასევე მის მიერვე ოკუპირებულ აფხაზეთს იქ განლაგებული მძლავრი სამხედრო ბაზითა და ე. წ. ერთიანი სამხედრო დაჯგუფებით. არავისთვის საიდულოს არ წარმოადგენს ის გარემოება, რომ აღნიშნული ბაზა და „დაჯგუფება“ მუდმივად ივსება ცოცხალი ძალითა და თანამედროვე სტრატეგიული შეიარაღებით. არსებული ინფორმაციის თანახმად, ასეთი შევსება ს. ლავროვის ვიზიტის მიმდინარეობის პარალელურადაც ხორციელდება.
აფხაზეთის ავტონომიური რესპუბლიკის უმაღლესი საბჭო და მთავრობა, გამოხატავს რა პროტესტს სერგეი ლავროვის სოხუმში ვიზიტთან დაკავშირებით,
- მკაცრად გმობს ოკუპირებული აფხაზეთის გამალებული მილიტარიზაციის, მცოცავი ანექსიისა და ავტონომიურ რესპუბლიკაში განხორციელებული ეთნიკური წმენდის, გენოციდის დაკანონების კრემლისეულ პოლიტიკას;
- მოუწოდებს თბილისში აკრედიტებული დიპლომატიური კორპუსის წარმომადგენლებს დაგმონ რუსეთის პოლიტიკა აფხაზეთთან მიმართებაში და მოითხოვონ მისი დეოკუპაცია;
- მიმართავს საქართველოს პარლამენტის ტერიტორიული მთლიანობის აღდგენის საკითხთა დროებით კომისიას კომპლექსურად განიხილოს ოკუპირებულ აფხაზეთში შექმნილი ვითარება;
- მიესალმება საერთაშორისო არენაზე საქართველოს საგარეო საქმეთა სამინისტროს აქტიურობას ოკუპირებული რეგიონების პრობლემატიკასთან დაკავშირებით და თხოვს მას განაგრძოს ძალისხმევა, რათა აფხაზეთის დეოკუპაციის საკითხი ყირიმის ანექსიასთან დაკავშირებით დაწესებული სანქციების კონტექსტში საერთაშორისო ორგანიზაციების მუდმივი განხილვის საგნად იქცეს;
- თხოვს საქართველოს იუსტიციის სამინისტროს განიხილოს ოკუპირებულ ტერიტორიებზე განლაგებული რუსული სამხედრო ბაზებისა და ე. წ. გაერთიანებული სამხედრო დაჯგუფების შექმნის თაობაზე გაფორმებული ხელშეკრულებების გაუქმების მიზნით საერთაშორისო სამართლებრივი მექანიზმების შესაძლო გამოყენების საკითხი.
აფხაზეთის ავტონომიური რესპუბლიკის უმაღლესი საბჭო
აფხაზეთის ავტონომიური რესპუბლიკის მთავრობა
