აფხაზეთის დღისადმი მიძღვნილ კვირეულს ბათუმი ტრადიციულად აქტიურად ეხმიანება. კვირეულის ფარგლებში დღეს დასრულდა ღონისძიებათა ციკლი, რომლის ორგანიზატორი იყო „ქართულ-აფხაზური საგა“და აფხაზეთის მეცნიერებათა ეროვნული აკადემია.
აფხაზეთობისადმი მიძღვნილ შეხვედრებში მონაწილეობდნენ და სიტყვებით გამოვიდნენ აჭარის მთავრობისა და მუნიციპალიტეტის, საკრებულოს წარმომადგენლები, აჭარის ჯანმრთელობის დაცვის მინისტრი ზაალ მიქელაძე, სოფლის მეურნეობის მინისტრი ტიტე არეშიძე, ქალაქ ბათუმის საკრებულოს თავმჯდომარე სულიკო თედიძე, “ქართულ-აფხაზური საგას” ხელმძღვანელები ნათელა დუმბაძე, ვანო პაპუნიძე, აჭარის საზოგადოების ცნობილი სახეები, აფხაზეთის მეცნიერებათა ეროვნული აკადემიის პრეზიდენტი ზურაბ ლომთათიძე, საერთაშორისო ორგანიზაცია - სოროპტიმისტინტერ ნაციონალი - კლუბი „ბათუმი“.
ღონისძიებაზე საინტერესოდ წარმოჩინდა აფხაზეთის ისტორიულ-პოლიტიკური თემატიკა, ფერიის აფხაზური სკოლის მოსწავლეებმა კი წარმოდგენა გამართეს მაჰაჯირობის თემაზე, რის შემდეგაც ღონისძიება ფერიის აფხაზურ სკოლაში გაგრძელდა, სადაც დაესწრნენ ღია გაკვეთილს. სკოლის მოსწავლეებმა აფხაზურ ენაზე წაიკითხეს ნაწყვეტები შ.რუსთაველის „ვეფხისტყაოსნიდან“, დ.გულიასა და ნ.დუმბაძის ნაწარმოებებიდან.
აფხაზეთობის დღის ფარგლებში აჭარაში გამართულ ღონისძიებებში მონაწილეობის მისაღებად იქ ჩავიდნენ და მის ორგანიზატორებს, თითოეულ მონაწილეს მადლობა გადაუხადეს აფხაზეთის ავტონომიური რესპუბლიკის უმაღლესი საბჭოს თავმჯდომარის მოადგილემ დავით გვაძაბიამ, უმაღლესი საბჭოს დეპუტატებმა ვახტანგ ყოლბაიამ, ელგუჯა გვაზავამ, სოხუმის უნივერსიტეტის რექტორმა ზურაბ ხონელიძემ.
ბატონმა დავით გვაძაბიამ განსაკუთრებული ემოციით და ხაზგასმით აღნიშნა, რომ „ქართულ-აფხაზური საგა“ და ფერიის საჯარო სკოლა მნიშვნელოვან ეროვნულ-სახელმწიფოებრივ მოღვაწეობას ეწევა აჭარაში, რაც აუცილებლად ჰპოვებს დადებით ასახვას ქვეყნის უპირველესი პრობლემის - აფხაზეთის კონფლიქტის, ოკუპირებული ტერიტორიების დაბრუნების, ამ ტერიტორიების ადგილობრივ მკვიდრთა - აფხაზთა დანარჩენ საქართველოსთან გაერთიანების სასიცოცხლო მნიშვნელობის საქმეში.
ბოლოს შეხვედრის მონაწილეებმა სიმბოლურად გვირგვინი ჩაუშვეს ზღვაში.
სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის ილია მეორის ლოცვა-კურთხევით გამოცხადებული აფხაზეთობის დღე - 23 მაისი, აჭარაში ფეიერვერკით დასრულდა.
