“ოკუპირებული აფხაზეთის ე.წ. საგარეო უწყების განცხადების ტექსტი რუსეთშია დაწერილი იმისათვის, რომ აფხაზებს აგრძნობინონ და უთხრან, თქვენ დამოუკიდებელი ქვეყანა ხართ და ნატო-ს უნდა გასცეთ პასუხიო”, – ამის შესახებ აფხაზეთის უმაღლესი საბჭოს თავმჯდომარე, ჯემალ გამახარია აცხადებს.

„სტოლტენბერგმა ნატო-ს სახელით გააკეთა ცალსახა, ძალიან მკვეთრი და მკაცრი განცხადება, რომ მხარს უჭერენ საქართველოსა და უკრაინის ტერიტორიულ მთლიანობას, მათ გაწევრიანებას ნატო-ში და რუსეთს არავითარი უფლება არ აქვს, ამაზე გავლენა მოახდინოს.

ამის შემდეგ აფხაზეთის ე.წ. საგარეო უწყებამ განცხადება გაავრცელა. ეს არის რუსეთში დაწერილი განცხადების ტექსტი იმისათვის, რომ აფხაზებს აგრძნობინონ და უთხრან, თქვენ დამოუკიდებელი ქვეყანა ხართ და ნატო-ს უნდა გასცეთ პასუხიო. სასაცილოა, როცა კითხულობ ამ დოკუმენტს. სასაცილოა, სატირალი რომ არ იყოს – აფხაზეთის დე ფაქტო საგარეო უწყება აკრიტიკებს ნატო-ს, ვითომ მის ორმაგ სტანდარტებს. ეს არავითარი სერიოზული დოკუმენტი არაა“, – განაცხადა ჯემალ გამახარიამ.

ცნობისთვის, ოკუპირებული აფხაზეთის ე.წ. საგარეო უწყებამ იენს სტოლტენბერგს უპასუხა.

„იენს სტოლტენბერგის თქმით, ისეთი ქვეყნების სუვერენიტეტი, როგორიცაა საქართველო ან უკრაინა, ნატო-სთვის წმინდაა და, ალიანსის ხელმძღვანლის სიტყვებით, მზადაა, დაიცვას ეს ქვეყნები ნებისმიერი, თუნდაც წარმოსახვითი ხელყოფისაგან. ნატო-ს ლიდერი საქართველოსა და უკრაინის უფლების, თავად გადაწყვიტონ თავიანთი მომავალი, ეჭვქვეშ დაყენებას ფიქრებშიც კი არ უშვებს. ამავე დროს, სტოლტენბერგის ლოგიკით, არსებობენ სხვა სახელმწიფოები, რომლებიც ნატო-ს კრიტერიუმებს ვერ აკმაყოფილებენ და რომლებსაც, მისი აზრით, არ აქვთ უფლება, დამოუკიდებლად გადაწყვიტონ თავიანთი ბედი. ეჭვგარეშეა, რომ ნატო-ს ხელმძღვანლობა აფხაზეთის რესპუბლიკას ამ უკანასკნელ კატეგორიას აკუთვნებს“, – ნათქვამია განცხადებაში.

როგორც განცხადებაშია აღნიშნული, „ნატო-ს ასეთი სტრატეგია სამხრეთ კავკასიის მიმართ ფეთქებადსაშიშია“.

„საჭირო არ არის იმის აღნიშვნა, თუ როგორი ფეთქებადსაშიშია ნატო-ს ასეთი სტრატეგია სამხრეთ კავკასიის მიმართ. დღეს ეს სტრატეგია დასავლური ალიანსის მიერ საქართველოსთან ერთად გამართულ რეგულარულ წვრთნებსა და თბილისის სამხედრო პოტენციალის გაძლიერებაში გამოიხატება. 2008 წლის მოვლენები ბრწყინვალე შეხსენებას უნდა წარმოადგენდეს ბრიუსელისა და ვაშინგტონისთვის იმის შესახებ, თუ რა შედეგები მოჰყვება საქართველოსთან ფლირტსა და დასავლეთის სამხედრო ბლოკში მის შეთრევას”, – ნათქვამია ე.წ. საგარეო უწყების განცხადებაში.

ნატო-ს გენერალური მდივნის, იენს სტოლტენბერგის განცხადებით, საქართველოს სურს, ნატო-ს წევრი გახდეს და ამას რუსეთი ვერ შეაჩერებს.

„საქართველოს სურს, ნატო-ს წევრი გახდეს და ამას რუსეთი ვერ შეაჩერებს. საქართველო გახდება თუ არა ნატო-ს წევრი ქვეყანა, ეს საქართველოსა და ჩრდილოატლანტიკური ალიანსის გადასაწყვეტია. ყველაფერი სხვა სუვერენული სახელმწიფოს სუვერენული უფლებების დარღვევა იქნება. რუსეთის გადასაწყვეტი არ არის ის, თუ როგორ უნდა მოიქცეს საქართველო. ეს საქართველოსა და ნატო-ს კავშირია. რაც მათ გააკეთეს აფხაზეთსა და სამხრეთ ოსეთში, ეს არის სუვერენული, დამოუკიდებელი სახელმწიფოს ტერიტორიული მთლიანობისა და სუვერენიტეტის დარღვევა, რაც მიუღებელია“, – განაცხადა სტოლტენბერგმა.

„რუსეთმა აფხაზეთი დაამშია და გააკოტრა“ – ჯემალ გამახარია ოკუპირებულ რეგიონში არსებულ მძიმე ვითარებაზე საუბრობს

“რუსეთმა აფხაზეთი ისე დაამშია, ეკონომიკურად ისე გააკოტრა, რომ მთლიანად მასზე დამოკიდებული გახადა”, – ამის შესახებ აფხაზეთის უმაღლესი საბჭოს თავმჯდომარე, ჯემალ გამახარია აცხადებს.

მედიაჰოლდინგ „კვირას“ პრესკლუბში გამართულ პრესკონფერენციაზე გამახარიამ ოკუპირებულ აფხაზეთში არსებულ მძიმე სოციალურ და ეკონომიკურ ვითარებაზე ისაუბრა. მისი თქმით, აფხაზეთში ენერგეტიკული კრიზისია.

„აფხაზეთში ნომერ პირველი პრობლემა 12 ნოემბერს რუსეთთან ხელმოწერილი პროგრამა გახლავთ, რომელიც რუსეთსა და აფხაზეთს შორის საერთო სოციალურ-ეკონომიკური სივრცის შექმნას ითვალისწინებს. ესაა ანექსიის ღიად დაწყება, ანექსიისთვის სამართლებრივი საფუძვლის შექმნა. იქ არსებულ ვითარებას, იქნება ეს პოლიტიკური, სოციალური თუ სხვა, განსაზღვრავს ეს ე.წ. პროგრამა, რომლის შესახებაც ღიად ბევრს არ ლაპარაკობენ. ეს პირველი პრობლემაა ჩვენთვისაც, რადგანაც თუ ეს პროგრამა განხორციელდა, არის უდიდესი საფრთხე, რომ აფხაზეთი რუსეთის მიერ ანექსირებული იქნება.

იქ ეკონომიკა არ არსებობს. ამ ყველაფერს დაემატა ენერგეტიკული კრიზისი, რაც ენგურჰესის გაჩერებითაა გამოწვეული. ენგურჰესი გუშინ გაჩერდა და აპრილის ბოლოდე იქ სარემონტო სამუშაოები ჩატარდება. ის მთელი სიმძლავრით, ალბათ, მაისის ბოლოს ამოქმედდება. მანამდე აფხაზეთს ელექტროენერგიას რუსეთი მიაწვდის. მაგრამ რუსეთიდან მიწოდებული ელექტროენერგიის ფასი შეუდარებლად უფრო მაღალია, ვიდრე – ენგურჰესიდან მიწოდებული ელექტროენერგიისა. აფხაზური საზოგადოება ამის გადამხდელი არ არის. დანახარჯები რუსეთმა იმ დაფინანსების ხარჯზე უნდა აინაზღაუროს, რასაც ის აფხაზეთში ეწევა. ანუ ბიუჯეტს მეტწილად ავსებს რუსეთი და იქედან მარტივად აინაზღაურებს ამ თანხას. უკვე ერთ კვირაზე მეტია, აფხაზეთში ელექტროენერგია გრაფიკით მიეწოდებათ. თოვლია, ყინვებია. შეიქმნა უმძიმესი სიტუაცია. სოციალურ ქსელებში რომ შეხვიდეთ, დღეს განსახილველი თემა ელექტროენერგიის პრობლემაა. ეს იმის გამო ხდება, რომ მათ საკმარისი ოდენობით ელექტროენერგია არ მიეწოდებათ.

რუსეთი აფხაზეთს ელექტროენერგიას რომ აწვდის, აფხაზები ამის საფასურად მარტო ფულს კი არ გადაიხდიან, არამედ ელექტროქსელები და მცირე სიმძლავრეები ამა წლის ივნისამდე რუსეთის ხელში უნდა გადავიდეს. ეს 12 ნოემბრის შეთანხმებითაც არის გათვალისწინებული. წარმოგიდგენიათ, რას უშვრება რუსეთი აფხაზეთს ვითომ დახმარების ფასად? მთელი ელექტროქსელები რუსეთის საკუთრებაში გადავა. ახალი თუ რამე აშენდა, ესეც მხოლოდ რუსეთის საკუთრებაში უნდა იყოს. ეს რომ გადაიფაროს და კარგად შეინიღბოს, აფხაზებს ეუბნებიან, რა ანექსია, მეგობრები ვართ და გაღიარებთო. ამ კუთხით განვიხილავ იმ განცხადებასაც, რომელიც ე.წ საგარეო უწყებამ სტოლტენბერგის განცხადებასთან დაკავშირებით გააკეთა.

რუსეთს აფხაზეთი ხელში უჭირავს, აფხაზეთი ისე დაამშია, ისე გააკოტრა ეკონომიკურად, რომ მთლიანად მასზე დამოკიდებული გახადა. რუსეთის გარეშე ხელფასებს, პენსიებს ვერ გასცემენ. ვერაფერს აკეთებენ“, – განაცხადა გამახარიამ.

მისივე თქმით, ამასთან, ოკუპირებულ აფხაზეთში მძიმე ეპიდემიოლოგიური ვითარებაა.

„ახალ წლამდე იქ სტაბილურად მძიმე ვითარება იყო. ახალი წლის შემდეგ კორონავირუსის აფეთქება მოხდა. მკვეთრად გაიზარდა დაინფიცირებულთა რაოდენობა. სიკვდილიანობა მატულობს. აფხაზები ამ ვითარებას ვერ უმკლავდებიან“, – განაცხადა ჯემალ გამახარიამ.

ხანძრების მძიმე შედეგებზე ოკუპირებულ აფხაზეთში საუბრობს ჯემალ გამახარია

აფხაზეთის უმაღლესი საბჭოს თავმჯდომარე, ჯემალ გამახარია ოკუპირებულ აფხაზეთში გაჩენილი ხანძრების მძიმე შედეგებზე საუბრობს.

როგორც გამახარიამ მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა, მისი ინფორმაციით, სხვადასხვა სოფელში 7-მდე სახლია გადამწვარი. მისივე თქმით, ასევე, დამწვარია თხილის პლანტაციები.

„ახლახან მთელი აფხაზეთი იწვოდა, დაწყებული გალიდან – გაგრის ჩათვლით. მეტ-ნაკლები ინტენსივობით ხანძარი ოჩამჩირეში, გულრიფშში, სოხუმის რაიონში, გუდაუთის რაიონში, ახალ ათონში, გაგრაში იყო. რა არის ამის მიზეზი? ეს სერიოზულ ეჭვებს ბადებს. მთელი აფხაზეთის ტერიტორიაზე ერთდროულად ხანძრების გაჩენა რით იყო გამოწვეული? ეს მართლა სტიქიური უბედურება იყო თუ ვიღაცის გამიზნული ქმედება? რომ არა წვიმა, რით დამთავრდებოდა ეს ყველაფერი, არავინ იცის.

არის პრობლემები, რომლებიც იმ ადამიანების ბედს უკავშირდება, ვინც ამ ხანძრების შედეგად დაზარალდა. აფხაზეთის დევნილი ხელისუფლება სერიოზულად მუშაობს ამ საკითხზე. ჩვენი მთავრობა იხილავს იმ ღონისძიებებს, რაც გვინდა, განვახორციელოთ ოკუპირებულ ტერიტორიაზე იმ ადამიანების დასახმარებლად, რომლებიც ამ ხანძრების შედეგად დაზარალდნენ. ჩვენი მონაცემებით, სხვადასხვა სოფელში 7-მდე სახლი საერთოდ გადამწვარია. დაიწვა თხილის პლანტაციები. ადამიანები ერთადერთი საარსებო წყაროს გარეშე არიან დარჩენილები. ჩვენ ვცდილობთ, როგორმე ჩვენი ბიუჯეტიდან გამოვათავისუფლოთ თანხები და დავეხმაროთ ამ ადამიანებს.

ამასთან, ჩვენ გავნაცხადეთ, რომ მზად ვართ, მონაწილეობა მივიღოთ გაგრაში ტყის საფარის აღდგენაშიც, თუ ამის საშუალება მოგვეცემა“, – განაცხადა გამახარიამ.