აფხაზეთის ავტონომიური რესპუბლიკის უმაღლესი საბჭოს თავმჯდომარემ სიტყვით მიმართა მოწვეულ სტუმრებს და აღნიშნა, რომ მისთვის ძალიან მნიშვნელოვანია თითოეული ქალბატონის ღვაწლის დაფასება, მათი თავდაუზოგავი შრომის რეალური შედეგების აღქმა და სამომავლო გეგმების მხარდაჭერა. ბატონმა ჯემალ გამახარიამ მადლობა გადაუხადა თითოეულ მათგანს, მიულოცა დამდეგი დღესასწაულები და გადასცა სიმბოლური საჩუქრები.
გამორჩეული ბიოგრაფიის ქალბატონებს მიმართა აფხაზეთის უმაღლესი საბჭოს თავმჯდომარის პირველმა მოადგილემ თამაზ ხუბუამ, რომელმაც თავის მხრივ მიულოცა მათ გაზაფხულის დღესასწაულები და აღნიშნა, რომ ამაყია ამ ქალბატონების მიერ განხორციელებული საქმიანობით და იმედოვნებს, რომ სამომავლოდ ისინი კიდევ უფრო მეტ წარმატებას მიაღწევენ უმაღლესი საბჭოს მხარდაჭერით.
დამდეგი დღესასწაულები მიულოცეს წარმატებულ ქალბატონებს აფხაზეთის ავტონომიური რესპუბლიკის უმაღლესი საბჭოს თავმჯდომარის მოადგილემ დავით გვაძაბიამ, უმაღლესი საბჭოს დეპუტატმა ვახტანგ ყოლბაიამ, კომისიის თავმჯდომარემ მურმან კვარაცხელიამ და უმაღლესი საბჭოს აპარატის უფროსმა ზურაბ მებონიამ. ღონისძიების დასასრულს, ქალთა დღესასწაულებთან დაკავშირებით სიმბოლური საჩუქრები გადასცეს როგორც მოწვეულ სტუმრებს, ასევე ყველა ქალბატონს, რომლებიც აფხაზეთის ავტონომიური რესპუბლიკის უმაღლესი საბჭოში მუშაობენ.
აფხაზეთის ავტონომიური რესპუბლიკის უმაღლესი საბჭოს საპატიო სიგელებით დაჯილდოვდნენ მარინა გელანტია, მაია ბენია, ნანა ჯიშკარიანი, მანანა გეგეჭკორი, თამარ შინჯიაშვილი, მზეონა კაკულია, სალომე მეკოშკიშვილი, თამარ ზარანდია და ციალა მესხია.
