ღონისძიება გაიმართა უმაღლესი საბჭოს ოურიდიულ-საპროცედურო კომიტეტის თავმჯდომარის ვახტანგ ყოლბაიას ინიციატივით. მან მიულოცა დამსწრე საზოგადოებას საქართველოს საფეხბურთო ნაკრების ბრწყინვალე გამარჯვება პორტუგალიასთან და ამ საზეიმო განწყობით გახსნა ღონისძიება.
მისასალმებელ სიტყვაში ვახტანგ ყოლბაიამ აღნიშნა, რომ გური ოტობაია გახლავთ ჩვენი კუთხის საამაყო ადამიანი, გამორჩეული პროზაიკოსი, პოეტი, ცნობილია მისი ეპიკური ნაწარმოებები და ერთ-ერთი ასეთი ნაწარმოები, რომელიც მან დღეს წარმოადგინა გახლავთ „ოდოია“.
გური ოტობაიამ აღნიშნულ ნაწარმოებზე საუბრისას ხაზი გასუვა მის კავშირებს მსოფლიო ლიტერატურასთან, ისტორიასთან, ზოგადსაკაცობრიო ფასეულობებთან. მასში საუბარია პროტოიბერიელთა - ქართლოსიანთა შესახებ, მის საწყისებზე ატლანტიდურ-შუმერული ცივილიზაციიდან კავკასიაში ლოკალიზებულ ცივილიზაციაზე, რომლის მთავარი ნიშანი გახლავთ ალტრუიზმი - სხვისთვის თავდადება, სხვისთვის სულის გაღება. ამ წიგნის სახით ნკითხველს ხელთ ექნება ზოგადკაცობრიული მისიის ამსახველი მაღალმხატვრული ეპიკური ნაწარმოები.
ღონისძიების დასასრულს ავტორმა მადლობა გადაუხადა მოწვევისთვის და საჩუქრად გადასცა წიგნები უმაღლესი საბჭოს თავმჯდომარეს და დეპუტატთა ჯგუფს.
ღონისძიებას ესწრებოდნენ უმაღლესი საბჭოს თავმჯდომარე ჯემალ გამახარია, თავმჯდომარის მოადგილე, სოციალურ-ეკონომიკურ საკითხთა, ჯანმრთელობის დაცვისა და დევნილთა საქმეების კომიტეტის თავმჯდომარე რუდიკ ცატავა, საერთაშორისო კავშირების, განათლებისა და კულტურის კომიტეტის თავმჯდომარე ნუგზარ მგალობლიშვილი, უმაღლესი საბჭოს წევრები რაისა ქარაია, თეიმურაზ მჟავია, ეთერ ასტემიროვა, უმაღლესი საბჭოს აპარატის თანამშრომლები.
