დილიდანვე მივიდნენ და კიდევ ერთხელ პატივი მიაგეს სამშობლოსათვის თავგანწირული მეომრების ხსოვნას აფხაზეთის ავტონომიური რესპუბლიკის უმაღლესი საბჭოს თავმჯდომარე ჯემალ გამახარია და დეპუტატთა კორპუსი. ყვავილების გვირგვინებით შეამკეს გმირთა მემორიალი, ვაშლიჯვრის ძმათა სასაფლაო, მიხეილ ჯინჭარაძის, ჟიული შარტავას და გურამ გაბესკირიას საფლავები.
ჯემალ გამახარიას თქმით, „ჩვენ უნდა შევძლოთ ურთიერთპატიება, ნდობის აღდგენა, შერიგება, ჩატეხილი ხიდების აღდგენა, რადგან მხოლოდ ქართველთა და აფხაზთა ერთობა და წარსულში დაშვებული შეცდომების გააზრება გადაარჩენს ჩვენს მომავალს“. „ამასთან, დღეს ჯვართამაღლების დიდი ქრისტიანული დღესასწაულია, გილოცავთ! დღეს მხოლოდ გლოვის დღე არ არის, დღეს იმედის დღეცაა, რომ მალე სოხუმში ყველა ერთად - უპირველესად აფხაზები და ქართველები შევძლებთ, ერთობლივად მივაგოთ პატივი ორივე მხრიდან სამშობლოსათვის თავდადებულ გმირებს“.
