მიმდინარე წლის 1 აპრილს საქართველოს პარლამენტმა მესამე მოსმენით განიხილა და კენჭი უყარა აფხაზეთის ავტონომიური რესპუბლიკის უმაღლესი საბჭოს მიერ ინიციირებულ ცვლილებას „საქართველოს ოკუპირებული ტერიტორიებიდან გადაადგილებულ პირთა დევნილთა შესახებ“ საქართველოს კანონში ცვლილებას, რომლის მიხედვით „დევნილი ოჯახის გრძელვადიანი საცხოვრებლით უზრუნველყოფის შესახებ შესაბამისი სამართლებრივი აქტის გამოცემის შემდეგ საცხოვრებელ ფართობზე მისი საკუთრების უფლების რეგისტრაციამდე ან სანაცვლოდ მის სათანადო ფულადი ან სხვა სახის დახმარებით უზრუნველყოფამდე დევნილი ოჯახის გრძელვადიანი საცხოვრებლით უზრუნველყოფა განხორციელდება მის გარდაცვალებამდე გამოცემული შესაბამისი სამართლებრივი აქტით განსაზღვრული დევნილი ოჯახის წევრების რაოდენობის გათვალისწინებით. ეს წესი არ ვრცელდება ერთსულიანი დევნილი ოჯახის გარდაცვლილი წევრის მემკვიდრეზე.“

ამ კანონის მოქმედება გავრცელდება აგრეთვე მის გამოქვეყნებამდე გამოცემულ და აღუსრულებელ დევნილი ოჯახის გრძელვადიანი საცხოვრებლით უზრუნველყოფის შესახებ შესაბამის სამართლებრივ აქტებზე.

ცვლილებების პროექტი პარლამენტს წარუდგინა აფხაზეთის ავტონომიური რესპუბლიკის უმაღლესი საბჭოს იურიდიულ და საპროცედურო საკითხთა კომიტეტის თავმჯდომარემ ვახტანგ ყოლბაიამ.