ოკუპირებულ აფხაზეთში გამართულ ე.წ ინაუგურაციას აფხაზეთის ა/რ უმაღლესი საბჭოს თავმჯდომარე ჯემალ გამახარია გამოეხმაურა. როგორც გამახარიამ აფხაზეთის საინფორმაციო-ანალიტიკური ცენტრის მედიასივრცეში განაცხადა, ბადრა გუნბას გუშინდელ ღონისძიებაზე შოუ, აფხაზეთში რუსეთის წარმომადგენელმა სერგეი კირიემკომ წაართვა.
„გუშინ სოხუმში ჩატარდა ე.წ ინაუგურაცია სცენარით, რომელიც ჩვენ არაერთხელ გვინახავს. თუმცა იმ განსხვავებით, რომ მთავარი მოქმედი პირი იყო არა ე.წ პრეზიდენტი, არამედ „მეფისნაცვალი” რუსეთის მიერ რეგიონში გამოგზავნილი სერგეი კირიენკო. სწორედ კირიენკო გასცემდა დავალებებს და დარიგებებს, თუ როგორ მოქცეულიყვნენ ამა თუ იმ საკითხებზე აფხაზები. გუშინ კიდევ ერთხელ ყველამ ვისაც დანახვა სურს კარგად დაინახა, რომ აფხაზეთის არის ოკუპირებული ტერიტორია და არავითარი დამოუკიდებლობა მათ არ გააჩნიათ. ისინი თავიდან ბოლომდე - პოლიტიკურად, ეკონომიკურად დამოკიდებულები არიან ოკუპანტ ძალაზე. შესაბამისად, რამდენიც არ უნდა გაითამაშონ ინაუგურაციები და არჩევნები -არაფერი არ იცვლება. მთავარია, რომ ეს ტერიტორია არის ოკუპირებული და დამოკიდებული რუსეთის ფედერაციაზე” - განაცხადა ჯემალ გამახარიამ.
მისივე თქმით, რუსეთი აფხაზებს, რამდენიმე სოციალური პრობლემების მოგვარებას დაჰპირდა. საუბარია - ელექტროენერგიის დეფიციტის აღმოფხვრაზე, საპენსიო ბარათების გაცემასა და აფხაზური მართვის მოწმობებით რუსეთის ფედერაციაში გადაადგილებაზე. სანაცვლოდ კი კრემლი გუნბას გუნდისგან სასურველი „კანონპროექტების”, მათ შორის „ინვესტიციების შესახებ კანონპროექტის” მიღებას მოელის.
აფხაზეთის ა/რ უმაღლესი საბჭოს თავმჯდომარე არ გამორიცხავს, რომ უახლოეს მომავალში აფხაზეთში პროტესტის ტალღამ იფეთქოს და აფხაზი ხალხი კვლავ ქუჩაში გამოვიდეს.
ინფორმაციას აფხაზეთის საინფორმაციო-ანალიტიკური ცენტრი ავრცელებს.
