მიმდინარე წლის 3 აპრილს აფხაზეთის უმაღლესი საბჭოს
პრეზიდიუმის და პლენარული სხდომები ჩატარდა, რომლებსაც თავმჯდომარე ჯემალ გამახარია
უძღვებოდა.
დეპუტატებმა განიხილეს დღის წესრიგით გათვალისწინებული
საკითხები: „აფხაზეთის ავტონომიური რესპუბლიკის კონსტიტუციაში ცვლილების შეტანის შესახებ“;
აფხაზეთის ავტონომიური რესპუბლიკის უმაღლესი საბჭოს ადამიანის უფლებათა დაცვისა და
აფხაზეთში კონფლიქტის დარეგულირებასთან დაკავშირებულ საკითხთა კომიტეტის ანგარიში
2024 წელს გაწეული საქმიანობის შესახებ“ და „უმაღლესი საბჭოს დეპუტატის ზ. ჯგუბურიას
საფრანგეთის რესპუბლიკაში ქ. პარიზი-ლევილი მივლინების შედეგების შესახებ“.
ავტონომიური რესპუბლიკის კონსტიტუციაში ცვლილების შეტანის
შესახებ ინფორმაციით უმაღლესი საბჭოს თავმჯდომარის პირველი მოადგილე, საფინანსო-საბიუჯეტო
კომიტეტის თავმჯდომარე თამაზ ხუბუა წარსდგა. მან აღნიშნა, რომ აფხაზეთის ავტონომიური
რესპუბლიკის კონსტიტუციაში ცვლილების შეტანის ინიციატორია აფხაზეთის უმაღლესი საბჭო.
კონსტიტუციურ კანონზე მუშაობდნენ უმაღლესი საბჭოსა და მთავრობის იურისტები, ექსპერტები,
მოწვეული კონსტიტუციონალისტები. კანონპროექტის გარშემო კონსულტაციები გაიმართა საქართველოს
პარლამენტის შესაბამის კომიტეტებსა და სამსახურებში. თამაზ ხუბუას განცხადებით, კანონის
პროექტის საჯარო განხილვები ჩატარდა აფხაზეთის მთავრობის სხვადასხვა უწყებაში, ასევე
სოხუმის სახელმწიფო უნივერსიტეტში, რომელშიც მონაწილეობას იღებდნენ დევნილი საზოგადოების
წარმომადგენლები, საჯარო მოხელეები, პროფესორ-მასწავლებლები, სტუდენტები, ომის ვეტერანები,
სხვა დაინტერესებული პირები. საკითხთან დაკავშირებით ჩატარდა 3 სხდომა, ხოლო გამოთქმული
წინადადებები და შენიშვნები გათვალისწინებულ იქნა კანონპროექტის მე-8 მუხლის პირველი
პუნქტის რედაქციის საბოლოო ვარიანტში. თამაზ ხუბუამ გამოხატა კმაყოფილება ზემოაღნიშნული
საკითხით საზოგადოების ფართო ფენების დაინტერესებასთან დაკავშირებით და აღნიშნა, რომ
ამ მიმართულებით მუშაობა გაგრძელდება. საკითხის განხილვის შემდეგ დეპუტატებმა მხარი
დაუჭირეს წარმოდგენილ წვლილებას.
პლენარულ სხდომაზე დეპუტატებმა მოისმინეს ადამიანის
უფლებათა დაცვისა და აფხაზეთში კონფლიქტის დარეგულირებასთან დაკავშირებულ საკითხთა
კომიტეტის თავმჯდომარის ადა მარშანიას ანგარიში კომიტეტის მიერ 2024 წელს გაწეული საქმიანობის
შესახებ. მან აღნიშნა, რომ 2024 წლის საანგარიშო პერიოდში, კომიტეტის საქმიანობის ძირითადი
მიმართულება იყო აფხაზეთის ა/რ მთავრობიდან და საქართველოს პარლამენტიდან შემოსულ კანონპროექტებზე
მუშაობა, კანონპროექტების განხილვა, წინადადებების, შენიშვნების და დასკვნების მომზადება.
ადა მარშანიას თქმით, კომიტეტი აგრეთვე აწარმოებდა და აწარმოებს შეხვედრებს საქართველოს
სხვადასხვა რეგიონში განსახლებულ დევნილებთან. კომიტეტს აქვს მჭიდრო კავშირი ოკუპირებული
აფხაზეთის ტერიტორიაზე მცხოვრებ ჩვენს თანამემამულეებთან. ამასთან, კომიტეტი სისტემატიურად
თანამშრომლობს არსამთავრობო ორგანიზაციებთან. ადა მარშანიამ ასევე ისაუბრა კომიტეტის
ინიციატივით, თუ მონაწილეობით ჩატარებულ ღონისძიებებზე. ხაზი გაუსვა ქვეყნის ცენტრალური
ხელისუფლების სტრუქტურებთან და მათ წარმომადგენლებთან მჭიდრო თანამშრომლობას. აღნიშნა,
რომ ნაყოფიერად მიმდინარეობს თანამშრომლობა საქართველოს პარლამენტის ტერიტორიული მთლიანობის
აღდგენისა და დეოკუპაციის საკითხებთან დაკავშირებულ დროებით კომისიასთან, სხვა კომიტეტებთან.
ანგარიშის განხილვის შემდეგ ინფორმაცია ცნობად იქნა მიღებული.
სხდომის ბოლო ნაწილი დაეთმო უმაღლესი საბჭოს დეპუტატის
ზურაბ ჯგუბურიას საფრანგეთის რესპუბლიკაში მივლინების შედეგების შესახებ ინფორმაციის
მოსმენას. ზურაბ ჯგუბურიას განცხადებით, მიმდინარე წლის 20 მარტს შესრულდა 106 წელი
აფხაზეთის ავტონომიის გამოცხადებიდან. ამ თარიღისადმი მიძღვნილი ღონისძიება ლევილის
მამულში გაიმართა, სადაც მოეწყო შეხვედრა ქართული დიასპორისა და საფრანგეთში საქართველოს
საელჩოს წარმომადგენლებთან. ამ და სხვა საინტერესო საკითხთან ერთად შეხვედრაზე განიხილეს
ქართულ-ფრანგული ურთიერთობების, საფრანგეთში მოღვაწე ქართული დიასპორული ორგაქნიზაციების
საქმიანობისა და მომავალში ერთობლივი პროექტების განხორციელების პერსპექტივები. ვიზიტის
ფარგლებში ღონისძიების მონაწილეებმა პატივი მიაგეს ლევილის მამულში დასაფლავებული საქართველოს
დამოუკიდებლობის ერთერთი ფუძემდებლის, საქართველოს პირველი დემოკრატიული რესპუბლიკის
საგარეო საქმეთა მინისტრის აკაკი ჩხენკელისა და საქართველოს დამფუძნებელი კრების წევრის,
1919-1921 წლებში აფხაზეთის სახალხო საბჭოს, შემდგომში აფხაზეთის მთავრობის თავმჯდომარის
დიმიტრი (არზაყან) ემუხვარის ხსოვნას.
ვიზიტის შედეგები მოიწონეს და თავისი მოსაზრებები გამოთქვეს
უმაღლესი საბჭოს თავმჯდომარემ ჯემალ გამახარიამ, დეპუტატებმა თამაზ ხუბუამ, ადა მარშანიამ,
ვახტანგ ყოლბაიამ, ელგუჯა გვაზავამ, ანზორ წოწონავამ.
სხდომა ნაწილობრივ დისტანციურ რეჟიმში მიმდინარეობდა.
გალერეა
