კორონავირუსთან დაკავშირებით ოკუპირებულ აფხაზეთში შექმნილი ვითარების შესახებ ჯემალ გამახარიამ აღნიშნა, რომ იქ უმძიმესი ვითარებაა; „არ გააჩნიათ კოვიდინფიცირებულთა მკურნალობისათვის საჭირო პირობები - არც ადამიანური, არც ფინანსური რესურსი. გუშინ საღამოს მონაცემებით, მათ უკვე ჰყავთ 726 დაინფიცირებული. ბოლო მონაცემით გამოაცხადეს, რომ ჩატარდა 172 ტესტირება, აქედან 52 აღმოჩნდა კოვიდდადებითი, ანუ ტესტირებულთა 27-28% დაავადებული აღმოჩნდა. შესაბამისად, თუ რა შედეგი დადგება, ძნელი სათქმელია. თითქოს წამლებით ეხმარებიან რუსეთიდან, მაგრამ რაც უფრო ეხმარებიან, მით უფრო იზრდება დაინფიცირებულთა რაოდენობა; ამან კი, შეუძლებელია არ დაგვაფიქროს!“- აღნიშნა აფხაზეთის უმაღლესი საბჭოს თავმჯდომარემ.
ჯემალ გამახარიას განცხადებით, ეპიდსიტუაცია უნდა განვიხილოთ ოკუპირებულ აფხაზეთში არსებულ პოლიტიკურ და ეკონომიკურ საკითხებთან კავშირში. შესაბამისად მნიშვნელოვანია აფხაზეთის დეფაქტო პრეზიდენტის ბჟანიას ბოლო ვიზიტი მოსკოვში და მისი შედეგები.
„ერთ კვირაზე მეტ ხანს იმყოფებოდა დეფაქტო პრეზიდენტი მოსკოვში და ფაქტობრივად ჩამოვიდა ცარიელი ხელებით; რას ითხოვენ აფხაზები მოსკოვისგან: ეს არის ფული, უპირველეს ყოვლისა და ელექტროენერგია, რომლის ძალიან დიდი დეფიციტია იქ. ფულთან დაკავაშირებით ითხოვენ, რომ, ჯერ ერთი, მიმდინარე წლის ბიუჯეტით გათვალისწინებული თანხები მიაწოდონ, რომელიც ჯერ არსაიდან ჩანს, ამასთან ითხოვეს, რომ რუსეთმა აფხაზეთს მომავალი წლისთვის გაუზარდოს დაფინანსება“. აფხაზეთის უმაღლესი საბჭოს თავმჯდომარის ინფორმაციით, დაფინანსების გაზრდაზე ბჟანიას კატეგორიული უარი უთხრეს. „რაც შეეხება ამ წლის თანხებს, ძალიან მცირე ნაწილია დაფინანსებული, ისიც ადგილობრივი შემოსავლებით. აფხაზეთი ფაქტობრივად დარჩენილი არის ბიუჯეტის გარეშე. ხელფასებს ვერ იღებენ მმართველობით ორგანოებში დასაქმებულები, რომლებიც აფხაზეთის შრომისუნარიანი მოსახლეობის 46%-ს შეადგენენ, ამათ ემატება პედაგოგები, ექიმები, პენსიონერები, რომლებიც უკიდურესად მძიმე მდგომარეობაში აღმოჩნდნენ. ამ კატეგორიაზე უფრო შეჭირვებულად იმყოფებიან ისინი, რომლებიც ვერ მოხვდნენ 46%-იანებში და არ არიან პედაგოგები, ექიმები, პენსიონერები და ა.შ.“
ჯემალ გამახარიას განცხადებით, ასლან ბჟანია მოსკოვიდან, მართალია, აფხაზეთისათვის ხელცარიელი ჩამოვიდა, მაგრამ იქ მთელი რიგი დავალებები მისცეს. „უპირველეს ყოვლისა, საუბარია იმაზე, რომ აუცილებლად უნდა დაიდოს ხელშეკრულება რუსეთსა და აფხაზეთს შორის მოქალაქეობის მიღების გამარტივების თაობაზე. ეს კარგად არის შეფუთული, მაგრამ რეალურად ეს იმას ნიშნავს, რომ როგორც აფხაზები ღებულობენ რუსეთის მოქალაქეობას, ზუსტად ასევე, გამარტივებულად მიიღონ რუსებმა აფხაზეთის მოქალაქეობა!
მოსკოვი ითხოვს ხელშეკრულების გაფორმებას სოხუმის დე ფაქტო ხელისუფლებასთან, რათა ოფიციალურად მიეცეთ რუსებს უფლება, გამარტივებული წესით გახდნენ აფხაზეთის მოქალაქეები. ამ ვითარებაში აფხაზეთის უმაღლესმა საბჭომ საქართველოს პარლამენტში საკანონმდებლო ინიციატივის წესით შეიტანა კანონპროექტი, რომელიც ითვალისწინებს ოკუპირებულ ტერიტორიაზე მცხოვრები ადამიანებისათვის, აფხაზებისათვის გამარტივებული წესით საქართველოს მოქალაქეობის მინიჭებას.
ჯემალ გამახარიას განმარტებით, კანონპროექტში შეთავაზებული არის სამი ძირითადი ცვლილება:
II-ოკუპირებულ ტერიტორიაზე მცხოვრებ პირს საქართველოს მოქალაქეობა უნდა მიენიჭოს არა ნატურალიზაციით, არამედ დაბადებით, რადგან აფხაზეთი საქართველოა;
III-საქართველოს კანონი მოქალაქეობის შესახებ ითვალისწინებს საგამონაკლისო წესით მოქალაქეობის მინიჭებას. ამ შემთხვევაში აუცილებელია გამოცდების ჩაბარება ქართულ ენაში, საქართველოს ისტორიასა და სამართლის საფუძვლებში. უმაღლესი საბჭოს მიერ შეტანილი ცვლილება ითვალისწინებს, რომ ოკუპირებული აფხაზეთის ტერიტორიაზე მცხოვრებმა ადამიანმა, რომელმაც არ იცის ქართული ენა და დღეს იქ შექმნილი ვითარებიდან გამომდინარე არც საშუალება აქვს და არც უფლება ისწავლოს ქართული, მაგრამ სურვილი აქვს იყოს საქართველოს მოქალაქე, დაერთოს ნება ჩააბაროს გამოცდა აფხაზურ ენაში, ვინაიდან საქართველოს კონსტიტუციის მიხედვით აფხაზური ენა ქართულთან ერთად არის საქართველოს სახელმწიფო ენა აფხაზეთში.
აფხაზეთის უმაღლესი საბჭოს თავმჯდომარის ჯემალ გამახარიას განცხადებით, აღნიშნული საკანონმდებლო ინიციატივა მნიშვნელოვანია არა მხოლოდ იმისათვის, რომ იქ გავუადვილოთ ადამიანებს საქართველოს მოქალაქეობის მიღება, არამედ პოლიტიკურადაც არის ძალიან მნიშვნელოვანი, რადგან ჩვენ აფხაზებს ვთხოვთ აფხაზური ენის გამოცდას საქართველოს მოქალაქეობის მისაღებად. ასე განმარტა უმაღლესი საბჭოს კანონპროექტის ძირითადი დებულებები „მედიაცენტრ მთავარში“ ბატონმა ჯემალ გამახარიამ.
